تساؤلات بنّاتية
ليش لازم لمّا أصحى الصبح أكون مبتسمة..لانه بجوز تيجي جارتنا زيارتها المعتادة و ما تحكي عني "صحوتي مش حلوة"
ليش لازم لما أقعد في الدار ..اقعد مهندسة و مرتبة و ما أضل ببجامتي ..عشان كمان لما تيجي جارتنا تحكي"ما شاء الله ..حتى في الدار مرتبة"
ليش لما أطلع ع الشارع لازم يكون راسي في الأرض و ما أتلفت شمال او يمين..مع انه الله كرم الراس و خلاها اعلى جزء في جسمنا
ليش لما كمان امشي بالشارع ازا طلعت مني ايتسامة ور احت من غير قصد في وجي واحد بنفش حاله و بحكي "ضحكتلي" أو ممكن لأ اكيد يحكي "هاي بنت مش مزبوطة"
ليش لما أروح ع الشغل أو ع الجامعة بحكي مع الزملاء "الذكور" و هدا مسموح...بس لما اشوفهم في الشارع ممنوع لأنه ممكن يشوفني حدا من البلد و يحكي علي
ليش لما بحكي ع الشات مع شباب في مواضيع "محترمة" بكون ضميري متريح ...بس لما نبلش عواطف بقلب 360 درجة و بأنبني ضميري ..مع انه في الحالتين بحكي مع شب
ليش لما بيجيني عريس لازم اكون زي ما بده و ألبس و أتزبط و أقعد و أسمع شو بده ... و إزا ما صار نصيب تنهدم الدنيا و لازم أتزكره كأنه هو الأول و الأخير
ليش لما أركب في السيارة أو التكسي أو الفورد أو الباص لازم اكون هادية و ما أحكي مع اللي بجنبي إلا بحدود "مرحبا و كيف حالك"...مع إنه ممكن توخد الطريق معي اكتر من ساعتين أو انه اللي بجنبي تكون صاحبتي
ليش لما أروح احضر عرس لازم اشوف الصبايا اللي ما تجاوزت أعمارهن ال 25 واقفات بتفرجوا ع العرسان و حاطين إيديهن ع خدودهن صافنات ... و كأنه حياتهن توقفت بمجرد زواج فلانه من فلان..و خلص ما في أمل
ليش لما يكون عمر الوحدة فينا 25 لازم ترضى بأي حدا .... مع انه بتكون حلوة و متعلمة و مؤدبة
ليش لازم ألبس رسمي و كعب عالي و امشي مشية"طق...موت" عشان أبين بنت جامعة و جاي ياأهل البلد جاي...مع إنه انا بحب البوات و الكعب العالي بتعبني
ليش لازم أكون نسخة عن نمط واحد من البنات ...مع انه بحب اكون دفرنت
ليش لازم اغير حالي ...مع انه انا بحب حالي هيك
و ليش ...أنا ما بنظّر لحقوق المرأة و لا بقتنع فيها...لانه اللي بمثلوا المرأة مش زيي و بدهم يخلقوا مني نسخة يسموها "المعنّفة"...إزا عندكم كمان أسئلة شاركوني
انا تعبت ...و بدي أروح أنام
هناك 10 تعليقات:
لا أقول لك إلا كما قال الشاعر :
إنني رافض عصري وزماني
ومن الرفض تخلق الأشياء
لا أقول لك إلا كما قال الشاعر :
إنني رافض عصري وزماني
ومن الرفض تخلق الأشياء
لا اقولها بدافع التشاؤم...و لكن الرفض مقترن بزمن ليس بطويل دائما...و قليلون من يخلق رفضهم منهم و لهم مدى آخر....
ارفض كما تشاء و متى و من شثت ..فتخلق من الرفض أشياء
أسعدني تواجدك..
ليش وأنا بقرأ حاسيتك بتحكي عني ..
مع اني مش جامعة ، ومع أني كمان مش مبلية بجارة بتجي كل صبح..
ليش؟؟!!
" يمكن لأنه أناانتِ "؟؟
كنت لما أسال ليش ،، بيردّ علي الكلّ
" مشان تسألي"
عن جد انا 25 سنة و يمكن في اشياء كتيرة بتنطبق علي بس ما بخلي الياس يدخللي من اي زاوية كانت لانه لولا فسحة الامل ما عاش الانسان و لا استمر
عروبة...
لأنه أنا و إنت واحد...و أسئلتنا البناتية مش مقترنة بزمان او مكان محدد...و فرق التجربة اللي بينا دفعني أسألها قبلك...
و ممكن جارتنا تزورك ....
"ما تخليها تطول عندكم...أسعدني تواجدك"
لانك عن جد بنت 25...
أنا و أنت كمان بنشترك بكتير اشياء ...و لكن اليأس نوع من أنواع التحدي لأوراحنا ..و مش غلط نمر فيه و نعيشه للحظة او لحظات...بس ما نخليه معانا يتحكم فينا...انتِ و انا و هي و هو و كلنا بدنا نتحكم فيه...
الامل رفيقك دائما صديقتي...
مرحبا
هموم فتاة فلسطينة ، نعم
هذا موجود وفي كل المجتمعات لكننا نرتاح لظواهر ونكره ظواهر اخرى لا نستسيغها فهي لا تجعلنا ممن يحب الخير كما قال تعالى عنا بعد أن خلقنا وكوننا بشر
(وإنه لحب الخير لشديد)
لا أدري لم لا يحبون الخير
ولا يجعلون الانسان صامتا في حديث طويل مع نفسه
اختي صفا
اتمنى عليك لو تكتبين بلغة قريبة من اللغة العربية الفصيحة حتى يرتاح لها الاخرون من العرب غير الفلسطينيين ويفهمونها
حبي واحترامي لك
sunrise
هي حال كل مجتمعاتنا ...وانا في حديثي عن عيشتنا ..أتتحدث عن ظواهر تسود حينا العربي بشكل عام ...
و اللغة لغتنا غنية بكافة المفردات سواء كانت مفردات فصيحة أو عامية...و أعتقد ان اللهجة الفلسطينة قريبة للاستيعاب من قبل جميع العرب إلى حد ما..و سأحاول الكتابة بلغة أقرب الى الفصيحة
شكرا لاهتمامك..
أنا بنت جامعة وكل هادا الاشي بصير معي بس خدي اللي يفهم التحضر بشكل صحيح يمكن البنات فاهمين انو التحضر اني اصير فري واروح اقعد مع شباب واتزانخ ومن هالحكي التحضر مش هيك التحضر انو كل واحد يحترم التاني ويحترم حقوقو وانو يعمل كل اشي بحس انو صح ومش غلط مع مراعات العادات والتقاليد الصحيحة البعيدة عن التعصب والرجعية وانها تكون تفكيرنا منطقي
تحياتي :فاتن ومجد
إرسال تعليق